شتائم .....       مشاعر مهمله .....       زيادة ملح الطعام تسبب أمراض المناعة الذاتية .....       محمد بن راشد: هدفنا تحقيق السعادة للمجتمع .....       محمد بن راشد يفتتح أعمال القمة الحكومية الأولى .....       تخلص من الكرش بواسطة الكمون‏ .....       الالتهابات التناسلية المتهم الأول للحمل خارج الرحم .....       السمنة تهدد الجمال والعلاقة الزوجية .....       أمراض الصيف تهاجم الأطفال دون سابق إنذار .....       خمسة أسئلة غذائية يطرحها الأميركيون لضمان صحة أفضل .....
الصفحة الرئيسية » لـقاءات شعريـه » الشاعر الجحجاح
مشاركة : عيون دبي اطبع المقال ارسل المقال لصديق
تاريخ الإضافة :: 05/09/2006   ||   عدد الزوار :: 9580
الشاعر الجحجاح

الشاعر الجحجاح

بدأ كتابة الشعر في عمر الــ 12 سنه وكان أول ظهور له في وسائل الاعلام سنه 2002 وكان مسؤول اللجنه الأدبيه بنادي إبداع طلبة جامعة الإمارات.

..............

تم هذا اللقاء عبر المنتدى من خلال أسئله الأعضاء وكان معه اللقاء التالي:

..............

حدثنا عن بطاقتك الشخصيه :::

ا
لعمر: 23، طالب في جامعة الإمارات العربيه المتحده  تخصص شريعه وقانون وعلى وشك التخرج ( خريج )، وموظف في الوقت نفسه، الهوايه: الرسم والشعر،،،


 شو تعنيلك هالكلمات

الفراق..
الشوق..
الغدر..
التجاااهل..

الفراق::يعنيلي الألم والعذاب وطبعاً لفراق أنواعه جثيره
الشوق::
إحساس جميل وأعتقد هالشعور بالذات ينبع من لب القلب وفي نظري الشوق أكثر شي يدل على الحب
الغدر::
سمة الغدر فهي سمة متعجرفه وتنبع من القلب الأسود عديم الإحساس وكذلك تنبع من النفس الخبيثه فالنفس ثلاثة أنواع: طيبه، خبيثه، مطمئنه
التجاهل::
التجاهل في لغة الشعر يسمونه ( الصد أو الجفا ) ويعنيلي الغرور إذا كانت أسبابه تغلي أو دلع، أما إذا كانت أسبابه منطقيه فلا بد منه وعلى فكره التجاهل سبب من أسباب الفراق

 موقف محرج واااااايد ...؟

بصراحه وايد صارتلي مواقف محرجه منها ..
كنت مره طالع كشته ويه ربعي وواحد فيهم شار علينا ندش العين مول مع إني ماأحب أدش المراكز التجاريه،المهم دشينا وبصراحه أنا كنت كاشخ مب عشان العين مول لكن لأني أحب أكشخ حتى لو سرت المزرعه أو العزبه، اكتشفت عقب ذيج اللفه كلها بإن كندورتي كلها آيل من ورى ومحد من ربعي انتبه إلا واحد منهم خبرني عقب فوات الأوان،وكنت ألاحظ نظرات الناس الغريبه لي بس ماكنت أعرف ليش...

 متى نزلت عبره الشااااعر ع خده .. ليش .. ومنو لي يمسح عبرته ع خده ..؟

هي مب عبره ولكن عبرات، نزلت عبراتي على خدي مرتين مره بسبب وفاة أخوي لكبير الله يرحمه والثانيه بسبب صدمه عاطفيه

شو يعني الشااعر الجحجاح وليش اخترت هالاسم..؟؟

معنى الجحجاح وهو ( السيّد السمح الكريم )...وسببه قصة طويله بختصرها لج... كنت مره في مكتبة الجامعه وحزتها كنت أتصفح كتاب للشعر النبطي وبالتحديد قصيدة مشاكاة للشاعر سالم الجمري يقول في مطلعها ( ولّيت يا ذا الدهر بأفراح *** وسعود ذاك الوقت ما دام ) فجلبت الصفحه لي عقبها لقيت رد على مشاكاة الجمري لشاعري المفضل والأول راشد الخضر وفي ضمن قصيدته لقيت هالبيت ( يا سالم الجمري لجحجاح *** نرجوا الفرج من سيد لارام ) فما عرفت شو معنى الجحجاح وشدني الفضول لمعرفتها وقلت بما إني في المكتبه خلني أستعير قاموس اللغه العربيه وأدورها بصراحه في البدايه توقعتها مفرده جديمه كانوا يتداولونها أجدادنا في لهجتهم بس اكتشفت إنها مفرده فصيحه ولقيتها فعلاً في القاموس، ووقتها كنت في فتره أفكر فيها أنشر قصايدي في المجلات بس بإسم مستعار فانتقيت هالمفرده إسم مستعار لي بس لن الخضر قايلنها ولو كان قايلنها أي شاعر غيره ما بهتم فيها، وعلى فكره عندي شهاده رسميه من وزارة الإعلام تنص على نسب هاللقب لي بإسمي ومحد يقدر ياخذه وفي حالة شفته في أي مجله لي الحق أرفع دعوى في المحكمه على لي نسبها له وأغرمه 50000 درهم وفقاً للبنود لي تنصها الشهاده لي عندي


الشاعر الجحجاح

الشعر انواع

شو نوع الشعر الذي تفضله وتستعمله في القصايد ؟؟


أميل للشعر النبطي وبالتحديد للشعر النبطي الشعبي ( الإماراتي ) البحت وهو لي أستخدمه في قصايدي .


امنيه يتمنى الشاعر الجحجاح ان تتحقق ؟

أتمنى أكون من هل الجنه إنشاء الله .

ابغي اسألك ليش وقفت عن تنزيل قصايدك فملحق شعر وفن؟

بصراحه وقفت عن النشر لأسباب جثيره ما أقدر أتطرق إلها منها... السبب من إدارة مجلة شعر وفن.. عدم الإنصاف يعني ما يعطون القصيده حقها في النشر تلقى القصيده الممتازه في آخر الملحق والقصيده التعبانه في أولى الصفحات بس لأن صاحبها فلان وفلان

-ما هي أهم المحطات أو المنعطفات التي تعتقد أنها ساهمت في تشكيل وبلورة هويتك الشعريه؟

ا
لسبب الأول والأهم هو كثرة إطلاعي لقصايد شعراء الإمارات لجدام يعني بختصار ( كثرة القراءة والمطالعه )، والسبب الثاني هو ربعي كلهم شعرا وكل سوالفنا عن الشعر وآخر أخباره وعلومه وكثرة المنافسات الشعريه بينا وكذلك كثرة الجلسات الشعريه

ما هو رأيك بجمهور الشعر الاماراتي؟ وما هو تقييمك للساحةالأدبية والشعريه في الامارات؟

وبالنسبه لجمهور الشعر الإماراتي في الحقيقه ماأقدر أبدي رايي فيهم لأن هالجمهور بحد ذاته طبقات وعينات، منهم لي يحب الجديم ومنهم ليديد ومنهم الفصيح، بس أنا أشوف بإن حالياً محد يهتم بالشعر الجديم والأغلبيه اتجه إلى الاهتمام بالشعر ليديد حتى طريقة إلقائه غير شكل، وتقييمي للساحه الشعريه الإماراتيه حالياً F، يعني متدني والسبب في اتجاه أغلبية شعراء الإمارات للكتابه بالنمط ليديد، إذا في سنة 96 أعتقد سألو الشاعر الجمري قبل وفاته في حوار صحفي ليش تركت الساحه الشعريه؟؟ قال: ماأشوف حد يستاهل إني أجاريه ألحينه كل لشعرا راحوا وكان قصده ( ماتوا )، فما بالج ألحينه ونحن في سنة 2004؟؟، وعن دور الشاعر في هالزمن،،،

-ما هو دور الشاعر في هذا الزمن ؟ وهل ما زال يلعب الشاعر فوق أرض تأثير صلبة ؟

دور الشاعر بغض النظر عن الزمن أو العصر لي عايش فيه هو ترجمة مشاعره الداخليه إلى شعر ( كلام موزون على بحر شعري معين ) وإيصال هذه الترجمه بالشكل المطلوب إلى الشخص المراد سواء كان شخص مفرد أو عدة أشخاص ( جمهور ) ومب بهدف شهره أو ماديات أو كسب إعجاب الجنس الآخر ولكن بهدف الكتابه من أجل الشعر نفسه، وأما عن دور الشاعر في هالزمن للأسف مختلف وأهدافه يا شهره أو افتخار أو كسب ود شخص معين أو ما ديات... إلخ، طبعاً مب الكل ولكن الأغلبيه

 متى كانت بداية الشاعر الجحجاح الشعرية ؟ وهل ممكن تذكر لنا شي من بداياتك ؟

ب
دايتي كانت يوم كان عمري 12 سنه، هيه أذكر بعض المقتطفات من بداياتي منها: ( انته الذي عيّشتنا في هالثرى *** وانته الذي تاخذ أجلنا ما تشا ) قلت هالبيت بصراحه ماأذكر مناسبته بس المعنى لي كان في بالي حزتها ( بإني اخاطب سبحانه وتعالى وأقوله بإنك انته لي خلقتنا وعيشتنا في هالأرض وفي نفس الوقت انته لي تقدر تاخذ أجلنا متى تريد ) وترجمت هالفكره في هالبيت

 هل الشعر في نظر الشاعر الحججاح بالفطرة ام الوراثة ام انها صفة مكتسبة ؟؟

ما أظن بإن الشعر صفة مكتسبه بس من ناحية الفطره والوراثه فهذا صحيح بالنسبه لي أنا بالفطره محد من هليه شاعر غيري - سبحان الله، ( صفة مكتسبه ) يعني كأن أي واحد يقدر يصير شاعر بالتعلم؟؟ ماأظن.

 
ما شاء الله الشاعر الحججاح ناقد مميز وقليل منهم من امثالك في الساحة الشعرية
ولماذا غاب النقد عن الساحة الشعري في المنتديات .. واصبح التصفيق والثناء على جميع الكتابات ؟


في المنتديات غاب النقد البناء فعلاً يمكن لعدم تواجد الأشخاص الكفؤ للنقد، ولكني شخصياً ألاحظ المجامله والتصفيج شرى ما قلتي وحتى لو كانت القصيده غير مكتمله، وللأسف إذا مراقب منتدى الشعر في المنتديات بنفسه يجامل ويساير صاحب المشاركه مع إن دوره عكس ذلك وبالمجامله بيستمر الشخص على غلطته وبيكون واثق من نفسه أكثر وأكثر، مب عيب إنه يثق بنفسه بالعكس بس على شي صح مب شي غلط، وأنا أطلب للمره الثانيه والثالثه من مراقب ومشرف منتدى الشعر هنى في منتدى الكتبي يهتمون شوي بالمبتدئين ويبتعدون قدر الإمكان عن المجاملات الزايده لي أعتبرها مب من صالح الارتقاء بالمستوى الشعري، ويمكن بعد المجامله إلها أسباب تعود للماديات أو مصلحة المنتدى نفسه، مثلاً إذا قام المراقب ينتقد كل واحد محد بيبقى في المنتدى والكل بيتشاءم وبييأس أما إذا سايره وجامله بيستمر أكثر وأكثر وهذا من صالح بقاء أكبر عدد من الأعضاء في المنتدى، وجهة نظر فقط،،،


 لمن تهدي هذي الابيات سواء فالمنتدى او خارج المنتدى ..؟؟

* الغدر يابن الناس مرٍ مذاقه .. ياليت والله ماعرفناك ياليت

أهديه إلى كل إنسان غدار

----
*تطمن لاتظن اني مع الايام راح انساك..لانك في فوادي كل معنى يسكن اعماقي

أهديه إلى كل شخص حبيته وحالت بينا الأقدار بلفراق

----
* الا يالله لاتقطع رجا اللي ..يسالك عن رجوع محب غايب

عباره عن دعاء وأهديه لكل إنسان اشتقتله

----
* ذكرتك ذكرتك وقلبي احتزن ..وأمسيت منكم متيم حزين

أهديه لكل من حبيته وافترقت عنه وأحاول أتناساه غصب عني

 ذكرى طيبه تحتفظ بها في نفسك ..؟؟

هو بطاقتي ( المبايل ) لأن هالرقم عطاني إياه أخويه قبل وفاته بسبوع الله يرحمه

 هذه مجموعة من العبارات لمن تهديها

*- الله يسامحك :

أهديها لج إنتي على أسألتج الصعبه

*- الله يخليك لي :

أهديها للشيبه والعيوز

*- عذرا لم اكن اقصد (سامحني) :

أهديها لكل إنسان غلطت عليه

*- تعجبني ثقافتك :

أهديها لدكتور مساق البلاغه العربيه في جامعة الإمارات

*- اتابع كل مواضيعك وردودك :

أهديها لكل عضو يشارك في أي موضوع بإسمي

*- كتاباتك مميزة :

أهديها لولد خالتي الشاعر عبدالله


*- لن انسى ما فعلته من اجلي ( شكرا لك ) :

أهديه لكل من ساعدني بالمعروف وقدم ليه يد العون


 أمضيت فترة طويلة في كتابة الشعر.. ما الذي حققه الجحجاح لنفسه من خلال الشعر؟؟

حققت لي ديوان شعري كبير محتفظ به عندي .


 برايك كيف و متى يأخذ الشاعر حقه في الانتشار؟

ياخذ الشاعر حقه في النشر بشاعريته إلي تحددله هذا الحق ومب بالماديات شرى ما نشوف هالأيام، وطبعاً ياخذ حقه بشاعريته إذا وجد الشخص المنصف والعادل إلي بدوره يقرر مستوى شاعرية هذا الشاعر وما يكون انحيازي للماديات أو للأسماء ذات المكانه الاجتماعيه ويغض النظر عن مستوى القصيده ولي هو الأهم .


 لماذا أغلبية الشعراء محصورين في إطار الغزل في يومنا هذا وإلاما ترمي توجههم إلى هذا الاتجاه بالذات؟.

الغزل منتشر أكثر من أي شي ثاني نلاحظ المدح والهجاء والرثاء وغيرها ولكن قليله أما الغزليه فهي الغالبه على الساحه الشعريه ومب من ألحينه .. من زمان والغزل منتشر أكثر من غيره وطبعاً هذا شي طبيعي لانتشار العلاقات الغراميه بين الجنسين .

يقال أجمل الشعر أكذبه ؟؟
ما رأيك بهذه المقوله ؟؟ وهل ترى نفسك تسير عليها؟؟

أنا مع هذي المقوله وأنا ما أمشي على هالقاعده في قصايدي أحب الصراحه في قصايدي .

الشاعر الجحجاح قلت مرة انك مقل في كتابة الشعر
فكم حصيلتك من القصائد ؟

بالعكس أنا أكتب وايد بس ما أنشر قصايدي لا فالمجلات ولا فالمنتديات، وحصيلتي كبيره جداً .


هل تتمنى أن يكون لك ديوان يحمل اسم الجحجاح ؟

بالطبع أتمنى هالشي وأفكر أسوي ديوان بإسمي وأطرحه في الأسواق .

خبرنيه عن طمووووحك وحلم تتمنى يتحقق ..؟

طموحي كسب رضى الله سبحانه وحلمي دخول الجنه .

اصعب قرار اتخذته ف حياااااتك ....؟

اختياري للتخصص إلي بدرسه في الجامعه .


اخويه الجحجاح لو كان لك موقع خااص بك طبعا اتوقع انه يكون عن الشعر لكن اللي ابا اعرفه ان شو هو هدف الجحجاح الرئيسي من هالموقع وشو هي اهم الاساسيات اللي بيرتكز عليها ؟؟

الهدف الرئيسي بيكون المقارنه بين شعر وشعراء الامارات في الماضي والحاضر، والاساسيات بتكون حرية المشاركه وإبداء الرأي ووضع سيره ذاتيه عن كل شاعر وشاعره من الامارات مع جميع قصائدهم .


شو هي الاجواء اللي تسااعدك على كتاابة الشعر ؟؟

التأثر بموقف معين، المنافسه، المناظره الشعريه الارتجاليه .

قصيده عيبتك وتمنيت انها تكون لك ؟؟ ومن كاتبها ؟؟

قصيدة ( تهنا بهواكم وامتحنا ) للشاعر راشد الخضر .


وشو هو الشي اللي بيمنع الجحجاااح عن كتااابة الشعر .. ( غير الموت ) عقب عمر طويل انشالله ؟؟ ولين متى بيتم الجحجااح يكتب الشعر ؟؟؟

ما أعتقد يمنعني شي غير الموت لأن الشعر فن والفن يباله ممارسه وما أقدر أودره عشان ما أنساه، وبتم أكتب لين ماشاء الله .

ذكرت ان محد من هلك شاعر غيرك
ومن ثم ذكرت اهدي ....كتباباتك مميزه لود خالتي الشاعر عبدالله
فما السر ؟؟؟ تراك قلت محد منهلي شاعر...وعقب قلت ولد خالتي واللي اعرفه ان كلمة الاهل تشمل جميع من يتصل بك عن صلة رحم

أنا كان قصدي بالأهل الوالد والوالده واخواني وبس وكتاباتي مب لولد خالتي وبس، كل لي بيني وبينه المشاكاه والرد فقط، لو دخلت مجلة أقلام الخاصه بمنتدى الكتبي بتحصل مشاكاه ورد لي ولولد خالتي بن برمان، وهني في منتدى الشعر مشاكاه ورد أعتقد قريته .

سبب توقفك عن الكتابه في الاونه الاخيره؟؟

أسباب خاصه اخوي بوشهاب واسمحلي ماأقدر أبوح ابها .

ما رأيك بالشاعره والغزل ؟؟؟

الشعر مب احتكار على الرياييل وبس وأنا أشجع كتابة الشعر النسائي ولكن مب شرى لي نشوفه اليوم تظهر جدام الخلق وتعد جدامهم أو تنشر صورتها واسمها في المجلات أعتقد حتى صوت المرأه عوره إذا وصل للبوح بالشعر الغزلي لأنه يثير الرياييل حتى وإن كانت متستره، أنا أقصد النشر بإسم مستعار فقط لا أكثر .

سبب تعلقك الكبير بالشاعر الخضر رحمه الله ؟؟؟

لأنه أول شاعر عرفته في حياتي وحفظتله وتربيت على اسلوبه في الشعر .

ماذا يعني لك : الجمري ...الخضر...راشد بن طناف...المايدي بن ظاهر....وغيرهم من الشعراء القدامى( رحمهم الله

هم أعلام الإمارات الأدبيه وبرحيلهم رحل الشعر الإماراتي في نظري، وآخرهم الشاعر خليفه بن مترف الله يرحمه
الجمري اتسم بالغزاره، والخضر اتسم بالبلاغه وبن طناف بالفكاهه والمايدي بالحكمه وغيرهم كل له سمه
وبعضهم تام لين اليوم شرى ربيع بن ياقوت وغيره


نزلت ديوان خاص بك ولا لأ ؟؟؟؟ اذا كانت الاجابه لا ..ما السبب؟؟

كنت بنزل ديوان شعري وعلى نفقة جامعة الإمارات ولكن حصلي ظرف خاص منعني من هالشي، وعندي من القصايد مايكفي لعدة دواوين


ما رأيك بالشعراء الذين يبيعون قصائدهم؟؟ ومن نظرك لماذا هذا الفعل

سبق وحطيت موضوع في قسم المناقشه عن هالشي، طبعاً ماأحترمهم لأنه باع مشاعره لغيره، ووايد شخصيات هني عندنا مب شعرا ولكن تلقالهم دواوين وتلقى المطربين يغنون الهم وكأنهم كبار الشعراء وهم مالهم خص في الشعر كيف؟؟ يشترون القصايد من الشعراء الفقراء خاصة شعراء سلطنة عمان، وأنا شخصيا أعرف شاعر ربيعي وبعيني شفت واحد من كبار الشخصيات يتصله وقاله شو آخر كتاباتك وبكم ؟؟ويمكن لو سمعت بهالأسماء تستغرب وتنصدم.

سبب تخفيك خلف اسم مستعار وعدم ذكر اسمك حين طلب منك؟؟
واذا ما عندك مانع .....الاسم الكريم:

لأني ماكنت أنشر بهدف الشهره وعشان يقولون فلان ولد فلان شاعر، ولكن لأني كنت أنشر لشخص معين كان يعرف بأن الجحجاح هو فلان ولد فلان وكان هدفي من النشر وصول هالقصايد لهذا الشخص .

اذا نزلت ديوان خاص بك هل سيكون باسمك الحقيقي ام باسم مستعار؟؟والسبب؟؟(عسب نلحق عليه)


طبعاً باللقب، لأني ماأفكر بشهره .

هل لك نشر في المنتديات الشعريه...(غير موقع عيون دبي االلي حاط فيه قصديتين بس) .؟؟اذا كانت الاجابه لا لماذا؟؟


نشرت قصايد مب موجوده هني في منتدى الكتبي على منتدى جديم كان اسمه بوخليفه وللأسف تكنسل من زمان .

ماذا تفضل تصفح مجله او كتاب....ام صفحات الانترنت؟؟


كتاب ثري بالمعلومات المفيده .

فهم النقد الشعري وكذلك بحور الشعر وعلم العروض........ما سببه؟؟ حب معرفه؟؟ فضول ؟؟ هدف ما؟؟


ووسائل اكتساب هذه العلوم....القراءة؟؟اسم كتاب مثلا(علنا نستفيد )؟؟ ام وسيلة اخرى؟؟
السبب الرئيسي هو كثرة المطالعه والقراءه وحب المعرفه، والسبب الثاني لأني حاصل على درجة امتياز في مساق علم العروض من جامعة الإمارات .

سؤال خارج نطاق الشعر(لتغييرالجو) : خلصت دراستك ولابعدك......مع تمنياتي لك بالتوفيق


المفروض مخلص من زمان لأني من دفعة 99، بس وقفت وايد وان شاء الله السنه اليايه بتخرج .

اذا طلب منك أحد الاصدقاء كتابة قصيده له...هل ستكتب؟؟ ولماذا؟؟


على حسب موضوعها وحق شو يباها، مثلاً لو قالي اكتبلي أبيات حق بطاقة عرس، أبيات مدح في أبوه، أي أبيات مفيده ومن وراها باخذ أجر بكتبله، أما يقولي كتبلي قصيده حق ربيعتي ولأ واحد ماأدانيه كتبلي قصيدة ذم وسب فيه شو خصني أكيد مابكتبله .

ما رأيك بمن يقول بعت قصيده لحاجه ولولاها لما فعلت؟؟


أقول بأنه محتاي وانجبر يسوي جيه، ولكنه في نظري بيتم خاين للشعر، وبها الطريقه تتم خيانة الشعر نفسه .

رأيك..سبب دفع اموال طائله(على حسب ما سمعت) لشراء قصائد من قبل اشخاص ليسوا بشعراء ومن ثم نسب القصيده إليهم؟؟..............وهل اسم شاعر يضيف على الانسان شيء فهو من طين كما باقي البشر؟؟


طبعاً أي واحد يتمنى يكون شاعر ، وخاصةً الهوامير ( vip ) عشان تكتمل شخصيته من جميع الزوايا وبالتالي يتم دفع هذه الأموال الطائله .

ما رأيك بما نراه .......الشاعر الفلاني مستعد لكتابة جميع القصائد المطلوبه لجميع المناسبات( وطبعا مش بلاش)؟؟


شوف إذا كان هالشاعر فاتح محل تجاري رسمي لكتابة الشعر لجميع المناسبات فهذا من حقه ياخذ فلوس لأن أكيد لي بيروح له بيحط في باله بأنه لازم يدفع، أما إذا كان في أي مكان يالس وياه حد يطلب منه قصيده لأي مناسبه وطلب منه فلوس فهذا شاعر مب أصيل، لأن نحن العرب منقود علينا نطلب فلوس لمثل هذي الطلبات، ومثل ما خبرتك المحل التجاري شي والشي الشخصي شي ثاني، أنا شخصياً لو أفتح محل باخذ فلوس وبدفعكم خاصةً انته بغلي عليك لأنك وايد تسأل ........:::

ه
ل شاركت بأمسيات شعريه؟؟واذا الجواب لا السبب؟؟


تمت دعوتي لعدة أمسيات شعريه وكانت ردة فعلي بالرفض، لأني ماأفكر بشهره ولا أحب أشارك في الامسيات .

هل كتبت قصيده ولن تنشرها....لأسباب خارجه عن السيطره؟؟


طبعاً سبق وخبرتك عندي من القصايد مايكفي لعدة دواوين

تتابع الساحه الشعريه ؟؟


بصراحه معرفتي ومعلوماتي عن شعراء الماضي أكثر بواايد عن شعراء هالزمن، يعني تقدر تقول بأني مب مهتم وايد في متابعة الساحه الشعريه الحاليه .

رأيك ببعض قصائد هذه الايام المغناه؟؟ ومن وجهة نظرك ما سبب هذا الاندفاع على الشعر والاهتمام به فجأه من قبل الكثيرين وكذلك على الأغاني والكل حاب يصير مطرب.


لأني أكيد يوم بصير شاعر بالتالي بيغنون حقي المطربين وإذا غنولي أكيد بشتهر وهذا هدف هالناس لي تقصدهم، وبصراحه أنا ماأسمع إلا الجديم بن روغه، ميحد، جابر جاسم، سعيد الشراري، ومرات حارب حسن لأن القصايد لي يغنونها صدق قصايد ، أما القصايد الحاليه المغناه تلقى فيها الخلل في الوزن ومضمونها صفر% .

رأيك بالبرامج الغنائيه هذه الايام...اسبابها؟؟ وغيرها من البرامج...التي تهدف اللى الحفاظ على التراث.


بصراحه بالنسبه للبرامج الغنائيه فأنا أعارضها بشده لأنها تضل الشباب وتشغلهم عن دينهم فيما لا يرضي الله تعالى، وأستغرب يوم أشوف بنيه متكشفه تغني في نجوم الخليج مثلا ويقولون بأن هذي بنت الامارات!! لا والمصيبه العوده بأنها يوم فازت حضر أبوها ( القدوه ) وحضنها جدام الناس وباركلها وعبرلها عن فرحته باللي وصلت له ، أما برنامج الميدان فهو ممتاز لأنه يحافظ على تراثنا .

عصيرك المفضل(تغييير جو)؟؟


عصير البطيخ ( اليح ) والشمام .

مسابقة: كتابة قصيده في الموضوع.(.......اي موضوع.........) وسيتم اختيار اجمل قصيده والجائزه (....اي مبلغ...) للفائز الاول وهكذا................هل ستشارك وتكتب؟؟ولماذا.


وما قولك على من يقول لا أستطيع ان اتحكم باحاسيسي واكتب اي شي؟؟
إذا بهدف المنافسه الشريفه ليش ماأكتب :، وأقول حق إلي مايتحكم بأحاسيسه بأنه يركز شوي ويحاول يفهم نفسه هو شو يبى يكتب .


هل توافق على الزواج من شاعره؟؟ ولماذا؟؟


عني أنا شخصياً : أشوف بأنه ما فيها أي شي أتزوج من شاعره بالعكس يمكن أنا أتمنى هالشي، بس بشرط وضوابط، بشرط ما تكون بارزه في الإعلام وتكون شاعره حق ريلها وبس، وطبعاً ما بدفن هالموهبه فيها بالعكس، بس شرى ما قلت يكون هالشي بيني وبينها بس وما تتطرق للإعلام والنشر وإن كان بإسم مستعار، لأنها متنشر حق امنو في المجلات ؟؟؟

وهالشي مب من جداها بس، حتى الريال المفروض ما ينشر قصايد غزليه فالإعلام دامه متزوج لأنه ينشرها حق امنو وزوجته وياه ؟؟؟

بس يجوز له ينشر قصايد وطنيه أو مدح لأحد الشخصيات الرجاليه الهامه في المجتمع، وبعد يجوز إلها هي كشاعره تنشر قصايد وطنيه أو مدح لإحدى الشخصيات النسائيه الهامه، على شرط يكون النشر بإسم مستعار منها

هذي وجهة نظري كشاعر



موقف الشاعر الجحجاح من الشعر الفصيح ...؟؟ تكتب فصيح؟؟ مهتم وهاوي فقط؟؟ لا تكتب ولا مهتم وهاوي؟؟ والسبب؟؟

الشعر الفصيح هو أساس الشعر النبطي ومنه تم استخلاص بحور الشعر النبطي، وطبعاً أنا أقرا وايد شعر فصيح وأقولك إذا تبى تنمي قدراتك وتكون شاعر قوي اقرا الفصيح وافهم معانيه، ولي قصائد قليله بالفصيح


هل فكرت تواصل دراسات عليا.

ان شاء الله أفكر أكمل ماجستير وعقبها الدكتوراه ان شاء الله في مجال القانون .


سؤالي الاخير أخوي الشاعرهل الـقاءات الشعريـه تقرب الشاعر بشكل عام من جماهيره ؟

نعم بالتأكيد لأن اللقاءات الشعريه تعد نوعاً من أنواع وسائل الإعلام التي يستطيع الشاعر من خلالها الوصول إلى الجمهور، ولا ننكر دور الإعلام الكبير في اشتهار الكثير من الشخصيات وبروزها في المجتمع  .

 

لمشاهدت قصائد الشاعر الجحجاح في مكتبة الشعر

....إضـغــط هــنــا....

التقييم : 3.00
التعليقات : ( 4 )
اسيرة الدمعه
ابصراحه عجبني الموضوع واني ابتديت كتابة الشعر من يوم اني صغيره الى الحين بس ماني عارفيه كيف انشره ياريتكم تساعدوني
تاريخ الإضافة : 20/11/2009

مشاركه وليس تعليق قصيده لشاعر الشيخ ناجي الوهبي
لعبت في بادي حياتي بدنياي=واليوم تلعب دنيتي في حياتي اسكر من النشوه وانا محتسي شاي=وازرع على وجه السحايب نباتي مدري عن اللي في يساري ويمناي=والهم مايعرف يجي حول ذاتي ارعى واسافر بالشجى لحن مغناي=واكسر على راس المصيبه عصاتي كاني من احساس الشجى صاحب الناي=اللي تنفس باالنغم من رياتي احس باالراحه تقبل خلاياي=واحس باالفرحه تدغدغ شفاتي والدفء في جو الونس يحضن اجزاي=في حب في فطره تجمع شتاتي واليوم في بحر الاسى حل منفاي=واتشتت فيني معاني جهاتي تطغى على الذكرى صور كبوة اخطاي =ما كنها تمحى الخطايا صلاتي ماصرت فاهم في اللغه وين معناي=او عدت امير عن حياتي مماتي الا لمن حبه ملك مهجة احشاي=يشرب رحايق لهفتي وامنياتي يعاهده دمي ولحمي واعضاي=ويعاهده ود الوفاء في لغاتي انه مع روحي يهاجر من اشلاي=اخر مودع ينتزع من رفاتي
تاريخ الإضافة : 02/05/2010

فرح
اتمنى لك السعادة واشعارك جميلة
تاريخ الإضافة : 20/05/2010

طائر الاحزان
ارى ان كلامك رائع واتمنى لك التوفيق
تاريخ الإضافة : 18/05/2010

الاسم
اضف تعليق
عودة »»